Stória Stória sta ta djobedu ku kafuka

Livro de Celina Pereira
Manuela Pereira, tuga ku alma di kriola, sta ta djobi stórias tradisional di Kabu Verdi pa publika na sé blog Palavra Imagem. Sé objetivu é publika kontus tradisional di tudu ilha di nós tera, ma na internet sta difisil di atxa. Nton, nu ka podi dexa Manuela djobi ku kafuka pa nu ka da-l un forsinha. Kenha ki kré manda-l un ó más storia, inderesu é palavraimagem@yahoo.com. Pra já, dja é teni dos kontu publikadu: un partis di Djarfogo e otu é "Unine", un kontu tradisional di Santanton, publikadu pa Leão Lopes en forma di livru.

Universu oral di Kabu Verdi é rei di riku. Difikuldadi é teni tudu kes storias rakodjedu y publikadu. Alias, keli é tema di prugrama Konbersu Sabi di sugunda fera, na TCV: tradison oral y modernidadi. Konvidadus é Tomé Varela da Silva y José Maria Semedo, dós investigador kultural. Pa Manuela, é util djobi livru "Na boka noti", di Tomé Varela, reditadu ontordia pa Institutu di Biblioteka Nasional. Un obra ki ta riuni storias di várius ilha. Nhos ta lenbra di kel tenpu, na 1988, kantu lus ta bába senpri y TVEC pára di dá? Ami, mininu, ku nhas irmon y kolegas, nu ta paraba di noti ta obiba stórias di Rosa Manka, sobri prinseza, Nho Rai, Nho Lobo ku Xibinhu, Bokaju...