arti risikladu arti risikladu arti risikladu

Na un pais undi ki tudu dia nu ten ki inventa novus manera di subrivivi, dispirdisiu ka podi kontisi. Si nu podi risikla, pamodi ki nu al perdi xansi di pruveta rikursu? Na transformason é ki sta ganhu. Lantuna diskubri, na Bairu Kraveru Lopis, na Praia, un artezon ki ta transforma pó di fós na verdaderus obra di arti. Shéu, di 42 anu, ta distaka na meiu di sés kulega di arti risikladu pa karinhu y paxenxa ki é ta dá pa akabamentu di sé obra.

Pa kumesa, é ta kema pós di fós y dipós, un pur un, é ta lixa-s. Forma di obijetu é fetu ku papelon, “ma ten ki ser di kés kaxa di leti kondensau, pamodi é riju y é ka ten poru pa entrada di ar”. Fazi siguinti é kola kada palitu na superfisi di papelon. Pa tirmina, é só lixa y verniza. Pronto, dja sta.

Nu ten bolsa, ku mutivu di tudu ilha, kandieru ku brazon di timis di futibol, meza, kaxa joia y tudu ki imaginason y teknika ta pirmiti fazi. Shéu ka ta consigui fazi un esposison pamodi sés pesa ta sai rei di faxi. Ma kenha ki sta interesadu na konxé-l midjor...9914386.