Nho Náni dja txiga

Dja txiga bés di Nho Náni. Violinista di Djarfogo ki vivé vinti anu di sé karera na sonbra, gosin dja kumesa ta ser divulgadu publikamenti.

Oji, Nho Náni ta prizenta sé arti seis y meia di tardi na Sentru Kultural Franses di Praia. Manha, oito ora di noti, violinista ta anima un jantar na Otel Praia Mar. É un sesão di prizentasão des artista pa komunikasão social, emprezarius y gentis ligadu na kultura.

“A apresentação do artista far-se-á rodeada de muitos condimentos, a saber, trajes tradicionais, reintrodução da viola de 10 cordas e um jantar à base de pratos tradicionais”, palavra di orgazanizasão, prizididu pa Aldino Barbosa. Sta ben ser un noti ku gostu di Djarfogu. Ten inda un prenda pa konvidadus: un atuasão di Mano Mendi, mestri di Cimboa.

Un inisiativa diferenti, pamodi sta ta falta es pratika di fazé di lansamentu di artista un festa mediatiku. Banda di Nho Náni é fetu pa Mané Kalote, na violão, Pêpa na viola de 10 korda, Augusto na kavakinhu y Perry na perkusão. Nho Náni dja anda un bokadu pa es mundu ku sé violinu: Merka, Purtugal, Fransa, Espanha y Angola. Só farta pa Kabu Verdi konxé-l.