Ten simana kultural kriolu na Abrantes
Nukliu di Studanti Kabuverdianu di Abrantis, na Purtugal, ta prumovi un Simana Kaboabrantina, di 11 ti 14 des més. Duranti kuatu dia, studanti kriolu ta mostra nos kultura pa gentis di kel sidadi purtuges.Simana ta kumesa ku ezibison di filmi “Nha Fala”, di Flora Gomes. Na dia 12, dos studantis kriolu, Herlander Santos e Jefferson Gomes, ta prizenta un palestra sobri literatura di Kabu Verdi. Un dia dipós, sta markadu un inkontru ku skritor José Luís Tavares. Simana ta tirmina dia 14, ku disportu, katxupada, poezia y musika. Simana Kaboabrantina é un parseria di Nukliu di Studanti Kabuverdianu di Abrantis, Asosiason di Geminason y Biblioteka Munisipal Botto.
pa Matilde era 15:54
2 Comments:
N'crê só expressa um sentimento relativo a kel escrita li.
Sempre n'ta fla ma nu tem k toma txeu cuidado cu forma k nu ta aborda um problema e, acima de tudo, presta txeu atenção a factores externos k podi influencia noz comportamento. Tudo isso pam fla ma, na nha ponto d vista, alguém k screve ez texto - n'ta pensa ma sta escrito na um hipotético crioulo - sta expressa, claramente, um abordagem dependente d um factor externo, ou seja: hora kê fla NUKLIU (núcleo, na Português), Sidade (cidade), EZIBISON, etc. sê objectivo é, principalmente, afasta do Português. Problema é k, mais um vez, noz forma de actuação, ao contrário do k muitos pensam, sta ser dependente do português, negativamente nez caso.
N'crê só fla: Nu ser simplismente kel k nôz é, nu ca tem k afasta d Português pamodi él é parte d noz História, ou nu crê ou nu ca crê...
E por ultimo, boa sorte pa comunidade Cabo-Verdiana de Abrantes, e k ez continua cu kel mesmo dinámica k ez tem demonstradu na ultimos anos.
Luis Carlos Silva aka Zezito
Oi, Zezito. Obrigadu pa bu komentário. Só un kuza: será ki bó bu ka sta ta fazi mesmu kuza oras ki bu ta skrebi ku kapa inves di c? Mi N ka ten ninhun problema ku purtuges: é nha lingua tanbé, é nha patrimoniu tanbé y N ten orgulhu nel. Nha kriteriu pa es forma di skrita é objetivu: é sigui regras di ALUPEK. Nen tudu sés regras, ma maioria. Obrigadu, Matilde
Enviar um comentário
<< Volta pa Lantuna