Kuzé ké Paladron?

Dja bu rapara ma Lantuna ta uza palavra Paladron pa indika fonti di notisia y fotu. Bom, Paladron é un palavra ki N obi di nha avó maternu, Augusta Gomes, ki vivé metadi di sé vida na Pikinhu, Fogo, ilha di origen di nha familia interu. É ta rifiri senpri paladron komu un fonti undi ki gentis di “zona norti” di Fogo ta bá buskaba agu ó laba ropa.

“Na kaminhu di paladron…” = na kaminhu-l fonti. Realmenti, tem un nasenti di agu doxi na Paladron (Praia do Ladrão), na Ribera Sanha, Freguezia di San Lorenso, Konsedju di San Filipi. Kel praia é un lugar di asesu difisil, pamodi é ta fika baxu-l rotxa. Era un sakrifisio txiga lá di baxu. Ma nisisidadi ka ta kansá...

“Na kel praia-l mar, tem un nasenti di água, ki ta korreba pa mar. Mi kantu N nasé, N atxa un paredi ki és fazé pa impidi kel agu di koré pa mar. Kantu N tinha 15 anu, és fazé un tanki pa pó agua, ma antis di és pó motor, era algen ki ta pagada pa bá buska agu lá dibaxu pa bem intxi tanki riba rotxa”, Nha Avó konta-n ma és ta pagada três skudu y meiu pa kada sinku vorta di águ, ki és transportaba na kabesa, na karman – ó kabasa.

Nha Avó ta fla ma Paladron ta forneseba agu pa milharis di gentis, na Freguezia di San Lorenso, desdi Pikinhu, Piku Dabega, Pombal, Topo Brumedjo, Nosa Sinhora da Lus, Txadinha y tous zona. Y és ta fla ma inda Paladron ten agu.