Dizastri di Sistensia ta konpleta 56 anu

20 di Fevereru di 1949. Dumingu. 11:30 di palmanhan. Un barudju forti obidu lá pa banda di prédiu di Asistensia, undi ki oji é Telecom. Era la ki koitadu ta resebeba ajuda y kumida. Ma na kel dia, paredi di kintal cai riba di un monti di gentis. 232 mori y 47 fika feridu. Un tragedia ki fika konxedu pa “Dizastri di Sistensia”. Un broxura di Palasiu di Kultura Ildo Lobo, ki ten testemunhu y parti di artigus publikadu na Voz di Povo, ta fla: “o vento passou a soprar em rajadas ciclónicas de 80 quilómetros…gritos…correrias…estupefacção”. Ten gentis ki fla ma és obi “gemidos, sangue, corpos trucidados, mães que procuram os filhos”. Ma testemunhu más signifikativu sobri manera ki mundu odja kel tragédia obidu di boka di invistigador Arnaldo França: “a rádio Moscovo noticiou na altura: o desastre na cidade da Praia define um Governo”.

Es dumingu li, ta kompleta 56 anu di Dizastri di Sistensia. Palasiu di Kultura Ildo Lobo ta pruveta tanbé tres més di morti di sé patrono pa fazi un resa sábado, 9 ora di noti. Y sugunda fera, ta abri espozison di fotografia “Momentos de Reflexão”. Ma é ka tem nobidadi: dja és mostraba el na 2003. Broxura é kel mé – és muda só kel ‘3’ pa fika 2005, ku kaneta feltro. Fika feio. Gentis: nu mesti otu jetu di fazi kusas.