AGENDA KULT - Bom pa Filmi!

Palásiu di Kultura sta ta prummovi un mostra di filmi pa marka batismu di kasa ku nomi di Ildo Lobo.

Na simana ki ta ben, bu ta podi odja 5 filmi, sobri Ildo, Orlando Pantera, Nacia Gomi, tabanka...forti sabi!

Sugunda, Seis y meia di tardi, ten "ILDO LOBO: NOS MORNA", un dukumentariu di 66 minutu, sinadu pa Hulda Lima, fetu na 2000. Tersa, Auditóriu di Palásiu ta mostra "MAIS ALMA", di Catarina Alves Costa, un ora di filmi detu na 2001.

"VIDA E OBRA DE NHA NACIA GOMI" é un filmi di 2000, fetu pa Rogério Marques, operador di imagen bodona. Bu ta podi odjal kurta fera. É 1 ora di Nha Nácia, sé filusofia sen igual...papiandu na kriolu.

Kinta fera, é bés di un fimi di Francisco Manso, fetu na 2000, ki txoma "DEZ GRAOZINHOS DE TERRA" (1º epis), un djunta mó de Cabo Verde, Itália y França.

Sesta, dia 26, senpri seis y meia di tardi, mostra di filmi ta mostra "TABANKA". Un dokumentariu fetu pa Angela Coutinho ku un ora di durason. Angela ben pa Kabu Verdi ku sé namoradu (un realizador italianu) y es filma kes ritual di tabanka - ka só disfili, ma tudu kel organizason di djunta mó, ierarkia, festa, riligiosidadi ki ta fazi di tabanka un entidade (sin sinhor) kultural ki mesti rispetadu.